Напярэдадні нацыянальнага свята Рэспублікі Беларусь дыпламаты Пасольства ўсклалі кветкі да месца пахавання ўдзельніка вызвалення Беларусі ад фашысцкіх захопнікаў Антоніа Арыяса.

 

А.Арыяс нарадзіўся ў 1915 г. у Мадрыдзе і у гады грамадзянскай вайны ў Іспаніі ваяваў у складзе рэспубліканскага войска ў якасці лётчыка-знішчальніка. У 1939 годзе эміграваў у СССР. У час Вялікай Айчыннай вайны абараняў Маскву і Ленінград. Будучы камандзірам эскадрыллі ў складзе 439-га знішчальнага авіяпалка, разам з іншымі іспанскімі лётчыкамі ўдзельнічаў у аперацыі «Баграціён», у тым ліку ў баявых дзеяннях непасрэдна пад Мінскам. Быў неаднаразова паранены. Баявую кар'еру скончыў ва Усходняй Прусіі ў 1944 годзе ў званні маёра. Узнагароджаны ордэнамі Чырвонага Сцяга, Айчыннай вайны 1-й і 2-й ступеней, медалямі. Пасля дэмабілізацыі жыў у Баранавічах, потым у Мінску, дзе працаваў на паліграфічным камбінаце імя Якуба Коласа. Вярнуўся ў Іспанію пасля распаду СССР. Памёр у Мадрыдзе ў 1993 годзе. Аўтар кнігі мемуараў «У вогненным небе» (выдадзена ў Беларусі ў 1988 годзе, у 1995 годзе выйшла ў Іспаніі).

 

Пасольства выказвае шчырую падзяку за дапамогу родным А.Арыяса, адміністрацыі сярэдняй школы №22 горада Мінска, а таксама Беларускаму дзяржаўнаму музею гісторыі Вялікай Айчыннай вайны.

 

Пры падрыхтоўцы дадзенай публікацыі выкарыстоўваліся інфармацыйныя матэрыялы Выдавецкага дома «Беларусь сегодня», часопісаў «Авиация и время» і «Авиация и космонавтика».